“على حد علمي ..احنا واسرائيل حبايب..فيه سلام ومفيش حرب ...طب الظباط والعساكر دول بيعملوا ايه في ميدان طلعت حرب ...!!ده بنت وولد نازلين يشوفوا بلوزة تليق على ايشارب ..!!بيحلموا وبيغنوا ..اجمل ما في غناهم انه طالع من القلب ..من امتى العشق كان بيموت من الخوف ..ومن امتى الحلم كان بيخاف من الضرب ..يا كابتن يا باشا خليك ابن بلد ..هوه انت معندكشي اخوات .. صبيان ولا بنات ؟؟!!يعني انتو كل عليتكو ظباط ..يعني انتم أصحاب اكاديمية الشرطة ؟؟!!واصحاب الشوارع.. والميادين و المحلات ..واصحاب البلد ؟؟!!طيب .. طب انا هاخرم من التحرير لدار القضاء العالي ..هاكل كشري واخش السيما .. مالك بقى ومالي ..؟؟!!معايا بطاقة وخلصت الجيش .. بتسمي ده اكل عيش ؟؟!يبقى عرفتك ..طب عريني .. فتشني .. قطعلي هدومي وافحصني وخلصني ..!!لا انت اول ولا اخر واحد ...عارف ..؟؟انا مرة القطر عدى وداسني وما موتش ...!!!!عشق الحياة مهوش ترف ..!!عرفت ايه معنى الشرف ..؟؟!!جتك القرف..!!جتك القرف!!”

“مبحفظش ارقام تليفونات ..لا ارقام ولاد ولا ارقام بنات ..الا رقم واحد ..فيه سبعه و تمانيه ..و اربعة و سته و وواحد ..مش سهل يعني ده وشه زي قفاه ..بس مش عارف ليه اشمعنا ده بالذات ..مش عارف انساه ..يمكن من كتر المكالمات ؟؟يمكن عشان المكالمات كانت بالساعات ؟؟والرسايل بالالافات ؟؟طب اغير انا رقمي ولا اعمل ايه ..مكانش رقم يعني فيه سبعين و تمانيين ..طب احفظ كل ارقام الناس التانيين ..الارقام السهلة و المكلكعين ..يمكن بعدها ..القي الارقام زي بعضها ..وانسي كل الارقام وقتها ..ميبقاش فيها رقم رخيص و رقم غالي ..ولا رقم فقير و رقم عالي ..ولا رقم حبي القديم ..اللي مات و انتهي ..”

“ميدان التحرير ده تحول الى جبلاية قرود بالمعنى الحرفي، لو قعدنا الف سنة في ميدان التحرير ماحدش حيسمع لنا، الثورة مش انك تتظاهر في المكان المسموح لك تتظاهر فيه.. ثورة ايه دي ياخويا؟ يعني ميدان التحرير بقى مطرح سلم النقابة ولا بيحل محل الاستاد؟اول ما رحنا عند مجلس الشعب واحنا كنا خمسة بس لقينا قوة كبيرة جات وقعدوا يقولوا لنا انتوا هنا ليه؟ انا مش حاروح اعتصم في حتة مافيش عسكري يسألني انت هنا بتعملي ايه؟ الثورة يعني اتظاهر في منطقة حيوية تخلي الناس تشوفني وتاخدني بجدية”

“أحمد : أنا سامع صريخ من برهأغلقت آية باب الغرفة ورجعت : دول ضيوف محمود ومعاهم واحد ربنا مبتليه بيحاول يساعده , ربنا يعفي عنك ..أحمد : يساعده ازاي يعني ؟آية : فيه مخلوق سفلي والعياذ بالله راكبه , جن كافر أحمد : جن لما يركبك انتي وهو , ايه يا آية اللي حصل لك , أمال لو مكنتيش متعلمة , وبعدين الباشمهندس بتاع الكمبيوتر من امتى بيطلع جن وعفاريت ؟آية : وطي صوتك , الناس هتسمعك متحرجنيش أحمد : يا آية ايه التخلف ده ؟ انتي رايحة على فين انتي وهو ؟”

“واحد شكله جديد عالفيس باعتلي عالإنبوكس وبيقولي"هو أنت تعرفني؟؟؟" .. قلت له "لأ معرفكشي" .. قالي لي "أصل انت بتظهرلي كتير عالجنب ضمن الأصدقاء المشتركين فقلت أكيد يعرفني" .. قلت له "لا والمصحف معرفكش" .. قالي "بس ده بيني وبينك 32 صديق مشترك" ..قلت له "و رب الكعبه معرفك" ..قالي "بص انا عملتك آدد عشان أنت كل شويه بتظهرلي في العمود اللي عالجنب ده فيمكن تطلع تعرفني" .. قلت له "يا مرحب يا سيدي بس للأمانه أنا معرفكش" .. قاللي " طب تعرف بقى واحد اسمه (محمود مش عارف ايه)" .. قلت له "لأ والله معرفوش" .. قالي "اصل انا لما عمتلك آدد لقيته ظهرلي ضمن الاصدقاء المشتركين فقلت اكيد يعرفني" .. قلت له "معرفوش و لو فضلت تضيف الناس بالطريقه دي هتلاقي نفسك بتتعرف عالفيس كله في خمس دقايق" ..قالي "طب أعمل ايه؟ بلاقيكو بتظهرولي كتير عالجنب كل شويه وأنا بزهق فبأضيفكوا وأقول يمكن يعرفوني" .. قلت له "طب طالما بتزهق مريحتش دماغك ليه و عملت لنا كلنا بلوك عشان منظهرلكش خالص عالجنب ده كل شويه" .. قالي "ما أنا خفت تطلعوا تعرفوني في الآخر فتدوروا عليا في الفيس تلاقوني عاملكوا بلوك فتزعلوا" !!!! قلت له فعلاً ..."الغَبـَــــاءْ لاَ دِيِنَ لـَــــــــــــه « ...”

“ابشع شيء حسيه هوه الخيانه والكدب في المشاعر سواء كانت خيانة من صديق او حتي خيانه من اي حد تاني اول سؤال بيجي في بالي ليه ؟ايوه ليه ؟ليه ؟ليه تكدب ؟علشان ما تجرحش اللي قدامك انت بدبك ده مش بتقتله مره انت بتقتله مليون مره انت بتحسسه انه ضعيف لدرجة انه صدق كدبك ليه ؟انت مش مضطر تكدب علشان اي حد لا علشانه ولا حتي علشان غيره ؟ليه تقول انك بتحبها او حتي يصدر منك اي تصرف يحسسها بحاجه زي كده مع انك في الحقيقه ابتديت تحب حد تاني او حتي تفكر في حد تاني مهو انت لو بتحبها او بتحترم الحب في حد ذاته هاتبقي وفي مش ليها لا لمعني الحب نفسه الاحلي انك طالما ماحبيتهاش او حتي مش متاكد من انك بتحبها او حتي بتفكر في حد تاني غيرها انك تبعد انك ما تكدبش ساعتها انت هاتحترم نفسك وهاتعرف ايه جواها وهيه هاتحتمك اكتر رحتي لو حبيت حد غيرها”