“أجمل فتره في الجواز هي اللي قبل الطلاق علطول”

“طول ما الشاب اللي بينزل التحرير دلوقتي هو نفسه اللي بيعاكس البنات بعد الضهر وهو نفسه اللي بيسب الدين عالقهوه و هو نفسه اللي بيزمبق زمايله في الشغل .. عمر ما البلد دي هتتصلح”

“في المليونيات كل ما يمسكوا واد بلطجي يصوروه بالفانله واللباس ويعرضوا جنب صورته كارنيه الحزب الوطني اللي لقوه معاه .. والله العيال البلطجيه دي أصيله قوي .. بتنسي تلبس هدومها وبتنسى تاخد بطايقها بس مبتنساش تدب كارنيه الوطني في بوكسراتها قبل ما تنزل تتبلطج .. عرفتي تربي يا سوزي ..”

“بس الشهاده لله إنه أجمل ما في ثورتنا العظيمه هي أنها أوصلت السياسة لكل مستويات الشعب بعد ما كانت بس مقتصره عالنخبه المثقفه .. شعور بالفخر لما تخش الفيسبوك وتلاقي (ريم _ المستعجله) دابه خناقه مع (تاحه _ مش _ مرتاحه) عشان مختلفين عالفرق ما بين دينيه الدوله وعلمانيتها”

“نفسي أعيش لليوم اللي أشوف فيه كلمه (صنع في مصر) محطوطه على أي حاجه تانيه غير الملابس الداخليه وقواعد التواليتات ..”

“أنا زوج مثالي جداً .. بشهاده كل الستات اللي عرفتهم ..”

“أكتر حاجه بتوجعني عالفيس لما ألاقي بنت كاتبه انها خلاص هتتخطب ومسافه ما اخش بروفايلها اباركلها ألاقيني أنا - و الميه و خمسين شاب اللي عندها - معمولنا ديليت في 3 ثواني ..المجد لكل بنت محسستنيش اني كنت مجرد اوبشن ..”