“صوت ضميري بقاله فتره مضايقني .. بس خلاص هعمله هزاز”

“المشاعر و العواطف ماتت فـ قلوب الناس .. قلوبهم بقت بالظبط زي موتور المايه .. بتضخ دم و خلاص بس كويس .. أهه ع الأقل فضل الدم موجود ,,, بس ,,, لحين إحتراق الموتور ..!”

“من كتر ما الكوتشي اتقطع كذا مره و صلحته برضه كذا مره أديه داب و مخليني مش عارف ألعب ... و بقيت من أقل شوطه أشوطها صوباعي يطلع يبص ع الشارع من شباك صغير و كل شويه أروح ألحمه .... محتاج أشتري كوتشي جديد و مش أي كوتشي هينفع .. كوتشي جديد بمواصفات معينه ...... و عشان كده محتاج فتره أختار كوتشي يناسبني و محتاج فتره كمان عشان يلين و ياخد شكل رجلي و أرتاح فيه ... بس الكوتشي ده مش هشتريه ... هعمله ع إيدي لإني زهقت من الجاهز و زهقت من كوني لو شوفت حد لابس كوتشي حلو أجيب زيه بالظبط حتي لو هيبقي شكله حلو عليا ... مش شرط الشكل .. المهم الأداء و الفاعليه ... لأول مره حاطط شكل للكوتشي اللي نفسي فيه ... و حاطط برضه شكل معين للآداء اللي هيكون عليه الكوتشي دهبإختصار لازم أشتري كوتشي جديد قريب”

“عارفه ليه واخد عليكي ضره !! لإني حبيتها .. أيوه حبيتها .. ببقي معاكي دايماً بس مش ناسيها .. أيوه مش ناسيها .. كرهتك كرهتك و بهرب منك ليها .. كل كلمه منك حق بس لأ لأ لأ .. ساعات أرجع أحبك لما بتعملي زيها .. بقول إتعلمت منها و راح منها غلها .. بس بعدها بترجع زي الأول و أنا أقول إزاي بسرعه قدرت !! .. ليه دايماً طبعك غالب !! .. و واخداها ع إنها مغلوب و غالب !! بس عارفه!! أنا كرهتها هي كمان .. لإن كل كلمه منها كدب × كدب و بترضيني و بس .. إنتو الإتنين زي بعض .. نسيت إنكو صحاب و جيران فـ عماره واحده .. عماره الحياه .. بس خلاص هسيبكو لبعض .. هعزل منها .. قريب .. شكري و تقديري لكي يا حقيقه .. و تحياتي لكي يا خيال .. سلام”

“الحياه زي الكتاب بس يا سلام لو ليه فهرس ..!”

“التنازل صعب .. بس دايماً الظروف اللي بتأدي ليه بتكون أصعب”

“كل واحد جواه كذا واحد .. المجنون .. العاقل .. المرح .. الكئيب .. الكويس .. الشرير .. بس كل واحد من دول ليه مثيرات معينه بدرجات معينه عشان يطلع ... بس إحنا لازم نتحكم فـ المثيرات دي .. عشان نختار اللي يقدر فيهم إنه يوصلنا للي بنتمناه ...”